May kanya – kayang mundo tayo ika nga. Madalas natin itong painugin sa sandaling pag – iisa at pananahimik.. Di man natin napapansin ay nadadala ka sa kakaibang mundong ito. Di ba minsan di mo maiwasang matulala na lamang at lumulutang ang isip sa tanikalang di mo alam ang patutunguhan, maya maya’y matatauhan ka at mamamlayan mo na patawid ka na pala ng kalsada. Maririnig mo na lang ang malutong na mura ng drayber…”Magpapakamatay ka ba?” Sa pagkakataong ito mapapayuko ka na lamang at sisisihin ang sarili sa naging katangahan.
Di ko alam kung kabaliwan bang matatawag ang pagkakaroon ng malikot na pag – iisip at malayang imahinasyon o ang mga ito’y produkto lamang ng damdaming sumasaklaw sa ating pag katao na sinasarili natin. Ito siguro ang kalayaan na gusto nating manatiling sa atin lamang o sa simpleng salita “privacy”. Bilang isang indibidwal nais nating magkaroon ng isang pribadong sandali upang maikubli ang sarili sa mapangahas na realidad at pakikipagsapalaran sa masalimuot na mundo.
Isang aspekto sa pagiging tao ay ang paghahanap ng lunas sa mga hatid na ingay sa suliranin sa araw araw na buhay. Nais nating mapalagay ang loob sa gina ng pag kaaburido, hinanakit, at kalungkutan na konkretong sangkap ng isang intelektwal na nilalang. Mas pinanaligan natin ang diwa kung saan o ano ang mga maidudulot nitong kasiyahan, at dahil ang tao ay likas na mapaghanap ng kaligayahan gagawa at aalamin ang ibat – ibang adaptasyon upang makamit ito. Hindi ba halos lahat sa atin ay dagliang napapangiti sa gitna ng pagdadalamhati kapag may kakaiba o kakatwang naganap sa harap natin?
Marahil ang mga ito ang natural na karakter nating mga tao sa pagharap at paghahanap ng kanya – kanyang lugar sa buhay. Hindi man kagandahan ang daan pasulong sa paroroonan pero patuloy parin tayong naghahanap ng ibang landas upang marating ang pinapangarap nating tagumpay. Ang mga daang paliko ay sumasagisag lamang na minsan tayo’y naging baliw sa kanya kanyang mundo at ito ang naging pampalipas oras sa sandaling kabiguan. At ang mga ito ay ikinukubli na lamang sa pribadong pag mumuni muni.
No comments:
Post a Comment